Heimatbund St.Tönis 1952 e.V.

Dä Rentner

VON THEO MÜLDERS     * 9. JULI 1900   + 27. MÄRZ 1995
      EHRENBÜRGER VON TÖNISVORST
      EHRENMITGLIED DES HEIMATBUNDES

 
      AUS SEINEM BUCH

      „DÄ ON DIE ON NOCH EN PAAR“


Mer es sue alt, wie mer sech föllt“, – hür ech öm sägge, wenn ech öm en de Wäeg luep.
Dat bettsche Krüzzping dat me’ik öm nix ut, och net, dat et hüre noelött.
Fang öm van de Famillij aan, off van et Wäer.
Ihr dou drei Sätz möt däm jekallt häß, es hä bee  s i n  Thema utje-kome: – de Jaart.
De Schlecke wöre öm an de Schlaat on et Obs küeß jett miehr Sonn verdrage.
Möt de dicke Bu’ehne hei hä Jlöck. Näewenaan, dä hei alles voll Mi’ele.
Hä hei se hart jepott, on enne Fenger de’ip.
Hä hät bee de Jarde jedennt.
Besöck öm mans te Hus, dann wißt hä dech et Reservebeld, eiter Jlas,
– jäel on verschoote van Alderdom.
En Potsdam heie se jestange on tehn Mont wör hä Bursche jewäß bee sinne Hauptmann.
Van däm hät dä och noch en Zijaretäsch ut echt Läer on dou dörfs ens
dodran ruke. Vandag es die Täsch läeg.
Hä schmockt nou de Pief möt bellije Portorico drenn.
I’en Päckske de Wäek, miehr sett neet dran.
Off dou nix dovan jehürt hei’s, – die Rente, die soll bald en de Hösch jo’ehn.
Ut de Täsch treckt hä en alt Notizböckske möt enne jemaserte Umschlag dröm,
van schwatt on jröin Jlanzpapier.
Do hät hä en Beld dren van et Ältst van sin Dauter. Do’e es hä be’i an de Du’ep.
Stolz kickt hä op dat We’it. – Die hät all enne Pottlapp janz alle’in jestreckt.
An sin Uhrkett bommelt en ahl Medaille möt de hellije Rock van Trier drop.
Sin Uhr treckt hä noch möt ne Schlüetel op, – mar die ji’eht op de Minütt.
No’e de Minütt dellt hä sech och sinnen Dag en, on hät doch nou su’evüel Tiet.
Mar osen Herjott mag wi’ete, wievüel Dag hä öm noch lött.
Jeddes Stöndsche di’et et ut, dat mer jett reites domöt anfängt.
Mer mot alles reit endi’ele, akrat wie die 170 Mark Rente,
– die hä sech jedde Mont op de Rentestell hollt.

back to top